Rundunar Sojojin Sama Ta Kaddamar Da Shirin ‘Diran Mikiya’ A Zamfara

Rundunar sojojin sama (NAF) ta kaddamar da shirin “Diran Mikiya” don fatattakar ‘yan bindigar da suka addabi al’ummar jihar Zamfara a ‘yan watannin nan. ABM Samson Akpasa, shugaban runduna na musamman dake aikin samar da zaman lafiya a yankin Zamfara ne ya sanar da haka ga ‘yan jarida ranar Talata a garin katisna. Ya yi bayanin cewa, za a gabatar da wanan shiri na fattakar ‘yan ta’ddan ne daga sansanin sojojin sama dake garin Katsina. “Babban farmaki za a kai, kuma a halin yanzu muna da dukkan kayan aikin da ake bukata don gudanar da farmakin. “Muna da jirage samfurin ‘Alpha jets’ da Diamond guda 42 don sintiri a sararin samaniya da jigin kai farmaki sanfurin MIC 35 da EC 135 da jirgi mai saukan ungulu sanfurin Ogusta 109. “Muna kuma sa ran zuwan sauran kayan aikin da muke bukata, a halin yanzu manyan motoci dauke da wasu kayayyakin sun iso muna kuma sauraron wasu nan gaba. “Rundunar sojojin saman Nijeriya bata taba irin wannan gaggarumin farmaki a kan ‘yan ta’adda ba a tarihinta. “A wannan karon zamu fuskanci aiki ne na dirar wa ‘yan ta’adda, kamar dai yadda sunan shirin yake na ‘’Diran Mikiya’’.
‘’Yan ta’adda za su samu gaggarumin matsala a jihar zamfara,” inji shi. Ya kuma kara da cewa, sojojin kasa dake a garin Gusau za su zama kashin bayan wannan shirin, yayin da rundunarmu ta sama zamu bayar da tallafi wajen samar da bayanin abubuwan dake faruwa daga sama. An ruwaito cewa, rundunar sojojin sun aika da dakaru na musamman daga bangaren K9 da karnuka da aka horas na musamman a filin jiragen sama na Umaru Musa Yar’adua a garin Katsina don karfafa tsaro. ‘yan ta’adda dauke da bindiga na ci gaba da gallaza wa mutanen jihar Zamfara.