Real Madrid Za Ta Biya Fam Miliyan 100 Akan Courtois Da Willian

Rahotanni daga kasar sipaniya sun bayyana cewa kungiyar kwallon kafa ta Real Madrid za ta hakura da neman dan wasan Chelsea Edin Hazard domin ta koma neman takwaransa na kungiyar wato Willian wanda akayiwa kudi fam miliyan 70. Kungiyar kwallon kafa ta Real Madrid dai ta dade tana zawarcin Hazard wanda Chelsea tace sai anbiya fam miliyan 200 sannan za ta siyar dashi adadin kudin da Barcelona ta karba kenan a hannun PSG lokacin cinikin Neymar. Sai dai kungiyar kwallon kafa ta Real Madrid tana ganin baza ta iya biyan haka ta siyi dan wasan ba mai shekara 27 a duniya wanda hakan yasa kungiyar ta fara tunanin neman dan wasa Willian dan kasar Brazil wanda shima yakeson barin kungiyar. Daman dai kungiyar tana zawarcin mai tsaron ragar kungiyar, Courtois, dan kasar Belgium wanda a kwanakin baya aka bayyana cewa ya kammala cimma yarjejeniya da Real Madrid akan adadin albashin da zasu dinga abashi. Kungiyoyin Manchester United da Barcelona ne dai suke zawarcin dan wasa Willian sai dai bayan da Barcelona ta kai tayin kudi har sau uku Chelsea tanayin fatali dashi tuni Barcelona ta je ta siyi dan wasa Malcom dan kasar Brazil daga kungiyar Bordeaud ta kasar Faransa. Yanzu dai ana ganin Real Madrid za ta iya biyan fam miliyan 100 domin ganin ta dauki Willian da Courtois sai dai za ta fuskanci kalubale daga bangaren Manchester United wajen neman Willian.