Mutane 21 Sun Nutse A Hatsarin Jirgin Ruwa A Sokoto

An gano gawarwakin mutane 21 bayan wani hadarin kwale-kwale da ya afku a karamar hukumar Rabah ta jihar Sokoto a jiya Alhamis, Darekta-Janar na hukumar bada agajin gaggawa ta kasa ne ya tabbatar da hakan a yau Juma’a, inda ya ce an kuma samu nasarar ceto wasu mutum 12. Ibrahim Dingyadi ya ce; yawancin mutanen ‘yan gudun hijira ne a jihar, kuma suna zama ne a sansanin ‘yan gudun hijira, yawan mutane a cikin karamin jirgin ruwa shine sanadin nutsewar mutanen. Ya kara da cewa, ‘mutane akalla 33 ne suka hau jirgin ruwan daga wani kauye Gandi inda sansanin ‘yan gudun hijira yake zuwa kauyen Gidan Kare dake karamar hukumar Rabah. Mafi yawan wadanda abun ya shafa mata ne da yara kanana, tuni anyi jana’izar wadanda suka rasa rayukansu. A karshe hukumar bada agajin gaggawa ta kasa ta gargadi masu jiragen ruwa da su kiyaye dibar mutane da yawa a jirgin don kiyaye hadaruka.