Yadda 'yan sanda suka kama Dino Malaye

Bayan kwana takwas 'yan sandan Najeriya suna dakon Sanata Dino Malaye ya fito su kama shi, a yanzu zaman zaman jiran ya kare domin kuwa tuni sanatan ya mika kansa.

Sanata Dino Malaye ya mika kansa ne ga 'yan sandan da suka kafa suka tsare a kofar gidansa da ke unguwar Maitama a Abuja, bayan kwana takwas suna zaman dakon fitowarsa domin su kama shi.

Alamu na nuna cewa sanatan yana fama da rashin lafiya, kuma wasu na ganin hakan da daga dalilan da suka saka ya fito ya mika kansa, bayan ya shafe kwanaki a cikin gidan na sa da ba shiga ba fita.

'Yan sandan sun ce sun samu takardar izinin kama sanata Dino domin ya amsa tambayoyi kan zarge-zargen da ake yi masa, amma sun ce sanatan ya kulle kansa ne lokacin da ya ga 'yan sanda, domin guje wa kamu.

Rundunar 'yan sandan ta ce an garzaya da Dino Malaye asibiti bayan ya mike kansa, kuma ya samu sauki yana cikin kyakkyawan yanayi, a cewar 'yan sandan.

'Yan sandan sun ce an duba Dino Malaye a asibitin 'yan sanda a Abuja.
Tun da farko wani dan uwa ga Sanata Dino Malaye ya shaida wa BBC cewa sun damu da halin da sanatan ke ciki, musamman yanayin lafiyar sa

'Yan sandan Najeriya suna neman Sanata Dino Malaye ne bisa zarginsa da yunkurin kisan kai tun watan Yulin 2018, lokacin da aka yi zargin 'yan bangar Dino ne suka kai farmaki kan wani dan sanda Sajan Danjuma Saliu a jihar Kogi.
'Yan sandan sun ce za a gurfanar da Dino a gaban kotu bayan kammala bincike.