Hazard ya haska fitilar zuwa Real Madrid

Dan wasan Chelsea, Eden Hazard ya kara tabbatar da cewar ta yiwu ya koma Real Madrid da taka-leda.

Har yanzu dan wasan na tawagar kwallon kafar Belgium mai shekara 28 bai saka hannu kan yarjejeniyar ci gaba da zama a Stamford Bridge ba, bayan da kwantiraginsa zai kare a 2020.

Hazard bai boye kishirwar cewar, wata rana za ta zo da zai koma Real Madrid da murza-leda, kuma ko a baya ya fada cewar ya so ya koma Spaniya bayan gasar cin kofin duniya.

Hazard din bai ci gaba da tattaunawa da mahukuntan Chelsea ba, don sabunta kwantiraginsa a Stamford Bridge, inda ya ce bai yanke shawarar makomar tamaularsa ba a nan gaba.

Chelsea ta kai zagayen gaba a Europa Cup, sannan tana ta hudu a gasar cin kofin Premier bana.