Jirgin kasa ya kauce hanya, ya kashe mutum 24

Jirgin da ya yi hadari a kusa da kan iyakar kasar da Bulgaria

Akalla mutum 24 ne suka mutu bayan da wani jirgin kasa ya kauce wa hanya a arewa maso yammacin Turkiyya, kamar yadda mataimakin Firaminista Recep Akdag ya ce.

Jirgin yana kan hanyarsa ne zuwa Istanbul daga Kapikule da ke kan iyakar kasar da Bulgaria.

Tarago shida na jirgin ne ya kaucewa hanya wanda ke dauke da fasinjoji kusan 360, a cewar kafar yada labarai ta kasar TRT.

Babu tabbas kan musabbabin hadarin amma mahukunta sun alakanta lamarin da rashin kyawun yanayi.

Sai dai sashin Turkiyya na CNN, ya ce rushewar wata gada ce ta haifar da hadarin.

Wata majiya a Rasha ta ce akwai 'yan yawon bude ido na kasar a cikin wadanda suka samu rauni.

Shugaba Recep Tayyip Erdogan ya tura sakon ta'aziyyarsa ga wadanda suka mutu bayan ya samu bayani daga ministocinsa.